Liebe Sven Toby

Mit dir im Tragtuech, schlofsch ruehig und seelig, sitz ich vor em Compi und probier äntlich emol, als dis Mami, e paar Sache ufzschribe vo dim no kurze Läbe.
Vor bald 3 Mönet hesch du e riiiiese Chrampf kah um s'Liecht vo dere Wält z'erblicke! Ich, mit dr Unterstützig vo dim Papi, ha dir mit aller Kraft so guet gholfe wie's nur gange isch!
Am 19.April ca.21:30, hesch du s'erste Zeiche gäh, dass du dich uf de Wäg machsch..... D'Fruchtblose isch gsprunge. Bi scho grad echli verschrocke und denn au im Momänt närvos worde, dass es jetzt wirklich los goht. Ha mir zwar die letschte Däg nüt anders gwünscht als, dass ich min dicke! Buch dörf verabschiede! Also, denn han ich mich in Rueh duscht und früsch aglegt. Jä und jetzt? Wie goht's witer? Wo blibe die Wehe? Warte und nomol warte! Nach drei Stunde, mit lichte und unregelmässige "Wehe", hän mir denn glich beschlosse uns uf de Wäg ins Frauespital Basel z'mache. Am 00:55 sin mir in dr Klinik acho und vo dr Hebamme begrüesst worde. Ganz gmüetlich hän mir denn s'Ufnahmegspröch gfüehrt und mir sin no x-Röhrli Bluet abzapft worde. (Nabelschnurspänt mitgmacht) Denn het me doch uf em CTG e paar Wehe gseh und au ich ha doch gspürt, dass es vorwärts goht. Nachdäm mich d'Hebamme untersuecht het und überrascht gsi isch, dass dr Muettermund scho 3cm eröffnet gsi isch, hän mir dörfe in Gebärsaal 1! Es isch inzwüsche scho nach de zwei am Morge gsi und din Papi und ich hän's uns gmüetlich gmacht im Gebärsaal. Musik glost, öbis drunke und ich bi während de Wehe, wo no guet verschnufbar gsi sin, uf em Ball umeghobst. Gli isch's denn heftig worde und ich ha's au nümme ganz so glatt gfunde. Wehe, eini nach der andere und heftig, dass me wahrschinlich uf emGang ghört het, dass do bald es Buschi uf d'Wält chunt. Wo denn d'Hebamme gmeint het, dass ich jetzt Presse dörf, han ich alli Kraft nomol zämme gnoh und druckt wie e "Stier"! Nach 5 Presswehephase het dis Chöpfli usegluegt und du hesch mit emene
Geknörtzel und mehrere Kopfbewegige die ersti "Läbensluft" gschnupperet. Nomol Prässe, und denn hän mir's doch tatsächlich gschaft! Am 04:09 Ich han dich uf min Buch ufe glüpft und dr Papi, du und ich hän uns s'erste Mol dörfe aluege und begrüesse. Unglaublich wie wach du uns scho agluegt hesch. No e Griff unters Tüechli und mir hän gwüsst, dass du dr Sven bisch. Ich bi eifach numme froh gsi, dass du do bisch, s'dir guet goht und ich keini Schmärze me ha!
Ich und din Papi hän die Geburt als sehr intensiv und schön erläbt und sin ganz stolz, dass mir jetzt dich dörfe uf dim Läbenswäg begleite und zueluege wie du gross und grösser wirsch.
Ich wird dir denn au no ufschribe wie die ersti Begegnig mit dinere Schwöster gsi isch und über all die Sache wo du scho hesch dörfe erläbe. Bisch e Schnüsel, han di fescht gärn! Vorallem jetzt wo du scho so vill blauderisch und lachsch!
Dis Mami Nicole