Luszipfel!

Es halbs Johr alt! Wenn ich dich so alueg, wird mir bewusst wie schnäll d'Zit vergoht. E Zit im mim Läbe wo seeeeehhhr intensiv isch. E wunderbari Zit wo vill, ganz vill Liebi drin steckt und ich vill, ganz vill lerne cha derbi. E Abschnitt im mim Läbe wo stolz macht, dörfe Mami z'si vo so zwei schnüselige und tolle Chinder. Es isch wirklich schön euch dörfe z'begleite und euch z'hälfe s'Rucksäckli z'packe für eure Läbenswäg. Es git natürlich au ganz villi Momänt wo ich mini Gränze gspür und ich Närve wie Drohtseili bruch. Mir lerne uf jede Fall ganz vill vo enander und ich bi gspannt wie's witer goht....
Ja, liebe Sven, du entwicklisch dich wirklich zumene luschtige und fröhliche Luszipfel! Du hesch freud am Läbe und zeigsch das allne mit dim sunnige Lächle. Denn gseht me dini zwei Zähnli und alli stuhne, dass du scho Bisserli hesch. Genau, BISSERLI! Warum du scho Zähn hesch weiss ich au nit genau.... bim Stille bruchsch si du eigentlich! no nit. Du hesch es glich usprobiert und mich kurz und heftig in d'Brust bisse! AUUUUUAHHHH! Bisch scho grad chli erstuhnt gsi warum ich so ufgschraue ha. Tatsächlich hesch du mir grad e chline Schlänz in d'Brust bisse...... bis das wider verheilt isch, han ich sicher e ganzi Wuche dra ume dökterlet. Ich glaub fascht, dass dr Zahn Nummere drei gester dure broche isch. Es cha numme besser wärde. Dini Zähn dörfsch du bim Oepfelringli chätsche bruche und au Dinkelstängeli hän mir dir kauft zum knage. So hoff ich, dass e witere Brustbiss verhinderbar isch.
Was du jetzt chasch: Ganz elei in dim TripTrap stitze und dis Oepfelbreili ässe. Mit allne mögliche Gegständ uf de Tisch hämmere, alles kurz ins Muul näh und am Bode schmeisse. Uf dr Spieldecki dich mit all dene tolle Spielsache vergnüege und wirklich für scho längeri Zit z'friede si. Frei Sitze chasch au scho fascht.....mit ganz villne weiche Chüssi um dich ume. Plumms! Dädä sage und fescht Gigse! Allne Lüt an de Hoor risse und Ohreringli useschlänze. De Papi chräble, dass es blutet. (S'Mami sött halt au d'Nägeli wider emol schniide!) Vill Lache und Gigele und mit dinere grosse Schwöster s'eifach luschtig ha. Bade, jä bade mit dr Leonie und derbi fescht sprütze, das findsch denn ganz glatt.

Schmutz

Mami Nicole